2011.01.24 Туслăх пытăр ĕмĕре ("Хыпар", Н. Георгиева)

ЧР Президенчĕ Михаил Игнатьев ертсе пыракан делегаци кăрлачăн 19-мĕшĕнче ĕçлĕ визитпа Ульяновск хулинче пулнине, облаçе йĕркеленĕренпе 68 çул çитнине халалланă савăнăçлă пухăва хутшăннине хаçатра пĕлтернĕччĕ ĕнтĕ.

“Эпир Иван Яковлевăн ĕçне малалла тăсатпăр. Вăл Атăлçи халăхĕсенчен чылайăшĕшĕн ăслă вĕрентÿçĕ пулнă. Çав халăхсем пĕр-пĕ­­ринпе килĕштерсе пурăннă. Шанатăп: Пĕтĕм чăвашсен Акатуйне пĕрлехи вăйпа çÿллĕ шайра ирттерĕпĕр”, - тенĕ Чăваш Ен Президенчĕ Михаил Игнатьев облаç кĕпĕрнаттăрне Сергей Морозова асăнмалăх парнесем панă май.

- Нумай нацилĕх тата тĕрлĕ конфессилĕх регион имиджĕн уйрăлми пайĕ тата унăн аталанăвĕн пĕлтерĕшлĕ вăйĕ пулса тăраççĕ. Кăçал эпир “Акатуй” наци уявне çĕр-шывăн пĕр кĕтесĕнчен тата ун тулашĕнчен хăнасем килсе çитессе кĕтетпĕр. Çакă Раççейпе танах, тĕнче шайĕнчи культура пулăмĕ, халăхсен туслăхне çирĕплетекен çĕнĕ утăм пулĕ. Михаил Игнатьев Президент ертсе пыракан делегаци паян ахальтен мар кунта, - тенĕ хăйĕн сăмахĕнче Сергей Морозов. - Палăртса хăварма кăмăллă: Ульяновск “НПППри культурăн тĕп хулисем” проекта Раççей ячĕпе хутшăнма ирĕк илнĕ.

Унтан Ульяновск облаçĕн Правительствипе Чăваш Республикин Министрсен Кабинечĕ Чăваш Республикин Культура кунĕсене тата Пĕтĕм чăвашсен Ульяновск облаçĕнчи “Акатуй” наци уявне йĕркелесе ирттерес енĕпе тачă çыхăну тытса ĕçлесси пирки калакан килĕшĕве алă пуснă.