ПУРНĂÇПА ВИЛĔМ

ПУРНĂÇПА ВИЛĔМ

Ушкăн-ушкăн шур пĕлĕт иртет...

Тăлăх хирте каç пулса килет.

Курăксене тайса сил вĕрет,

Çĕр çумĕпе тусан вĕçтерет...

Хирте пĕр тĕмеске пĕр-пĕччен...

Тăпри ҫине пуснă вĕлтĕрен.

Вилнĕ ҫын тăпри вӑл — çак тăпра,

Ырă çынни вилнĕ вăрçăра.

Ĕç ачи вӑл. Çĕнĕ пурнăçа

Сыхласа вилнĕ вӑл — çапăçса.

Чухăнсемшĕн хăйĕн кун-çулне,

Çамрăк ĕмĕрне вӑл хĕрхенмен.

Коммунизм хĕрлĕ ялавне

Чун тухиччен çĕре ӳкермен.

Çывăр, тăван, иртрĕ ĕмĕрӳ...

Вăхăтсăрах сан тухрĕ чуну.

Анчах çăмăл пултăрччĕ тăпру,

Канлĕ пултăр нӳрĕ вырăну!..

Мĕскĕн тăван, сан чуну тухсан

Никамăн та куççулĕ юхман.

Санăн куçна арăму хупман,

Аннӳ масар ҫине ăсатман.

Ютри çынсем сана аякка

Пытарайнă çакă шăтăка.

Тăванăмçăм, вăрансам, вăран

Çак вăхăтсăр йăвăр ăйхăран:

Килте çамрăк арăму кĕтет;

Ачу: «Атте хăçан килет?» — тет.

Эх, тăванăм, иртнĕ кун-çула

Кам çавăрса парӗ каялла?

Уя ака тумашкăн тухсан

Юрру илтĕнес çук ĕнтĕ сан;

Тек кураймăн пĕлĕт çуттине;

Илтеес çук тăри юррине;

Кăчăрт-кăчăрт тырă вырнă чух

Санăн аллу çурла тытас çук...

Çĕр иртет те... килет çутă ир...

Анчах ĕмĕр пĕччен тăлăх хир.

Вĕлтĕрене тайса ҫил вĕрет,

Вилнисене асăнса йĕрет...

1918 ç. кĕркунне, Хусан;

1920 ç. çулла, Касаккасси