КĔПЕР ХЫВĂР!

КĔПЕР ХЫВĂР!

Çулсем... Çулсем çинче вилесем,

Укăлчасем панче вил шăмсем,

Ах, йăвăр, йăвăр, пăчă...

Эй!

Эсир,

Чĕррисем,

Вилесем урлă, шăм куписем çинче

Хĕвеллĕ ыран енне

Кĕпер чĕнтĕрлĕр.

Ах!

Кĕпер чĕнтĕрлĕр.

Эпĕ

Халран кайса ӳксессĕн,

Ман урлă таптаса каҫса кайăр,

Тимĕр урăрсемпе чĕрем ҫине

Хăюллăн таптăр.

Ах!

Таптăр,

Ӗнсене хуçăр.

Кĕперне хывнă чух эп

Халран кайса вилсессĕн,

Мана кĕпер айне

В-е-е-ç-ç!

Перĕр!

Ах,

Перĕр, перĕр!

Вăхăт — ачашлăх вăхăч мар.

Ăш юрă вăхăчĕ кайра,

Малта хĕвел.

Ку вăхăт — вилĕм вăхăчĕ.

Кам куçĕ куçҫуль кăлармĕ,

Кам чунĕ чул —

Кĕпер урлă!

Ик ушкăн:

Паттăррисем — çав кĕпер урлă

Халсăррисене

Кĕпер айне перĕç.

Çул-çул тӑрӑх вилесем.

Уй-уй урлă

Купан-купан вил шăм.

Эй, чĕррисем! Вилесем урлă

Ыран патне

Кĕпер хывăр.

Ах,

Нăшкатăп,

Хал пĕтрĕ, хул халсăр...

Эй!

Ывăтăр мана,

Веҫ — ывăтăр,

Кĕпер айне ывăтăр мана.

Ах.

Ӗнсене хуçăр.

1921 ç. юпан 30-мĕшĕ