2005.04.23 Саламлатпăр! //Хыпар

 

 

Паян сирĕншĕн, "Хыпар" хаçатшăн, Чăваш Республикинчи журналистсен пĕрлĕхĕшĕн те - паллă кун: наци журналистикине пуçарса янă кăларăмăн общество корреспонденчĕсен съезчĕ ĕçлет.

Ватă çын - тăватă çын теççĕ чăвашсем. Çак сăмах "Хыпар" хаçатшăн та вырăнлă, вăл истори тата политика опытне, професси шайĕнчи ят-сумне кура тата хăйĕн обществăри вырăнĕпе, турĕлĕхĕпе, пичетри сăмахăн пысăк ячĕ -сумĕпе пур чăвашшăн та тĕслĕх пулса тăрать.

Çĕр çул хушшинче хаçат ячĕ, политикăри çул-йĕр улшăнса тăнă, анчах вăл пур тапхăрта та чăваш халăхĕшĕн ĕçленĕ, унăн интересĕсене, халăхсен хушшинчи тăнăçлăха хỹтĕленĕ.

"Хыпар" хаçатăн çитĕнĕвĕ нумай чухне сирĕнтен, эсир чунран, тỹрĕ кăмăлпа çырнă статьясенчен килет. Çакна шанса тăратăп: "Хыпарăн" общество корреспонденчĕсен паян иртекен съезчĕ Чăваш Республикинчи, Раççей Федерацийĕнчи халăхсен хушшинчи тăнăçлăха çирĕплетме, хаçат ят-сумне, тиражне ỹстерме, Чăваш Енпе тата унăн тулашĕнче пурăнакан чăвашсемпе ĕçри, культурăри, информаци енĕпе тунă çыхăнусене çирĕплетме пулăшĕ. Сире съезда килнĕ ятпа саламлатăп, тухăçлă ĕçлеме ăнăçу сунатăп!

Çакна палăртма кăмăллă, "Хыпара" яланах çырса тăнипе эсир хаклайми те пысăк пĕлтерĕшлĕ ĕç туса пыратăр, хаçатсем тематикипе анлă, срдержанийĕпе интереслĕ пулччăр тесе сахал мар вăй хуратăр. Эсир тăрăшнипе хаçат вулакансене çĕнĕ хыпарсене кунран-кун, номертен номере пĕлтерсех тăрать, паянхи çивĕч ыйтусен тулли хуравĕсене парать. Çавăншăн Эсир тав сăмахне тивĕçлĕ .

Журналистсен союзĕ эсир малашне те пичет ĕçне активлăн хутшăнасса, çапла майпа Чăваш Енĕн экономикипе социаллă пурнăçне аталантарма пулăшасса шансах тăрать. Ырă сывлăх, пултарулăхри ỹсĕмлĕх яланах сирĕнпе пулччăр, чăваш хаçачĕн чăн-чăн хыпарçисем!

 

 

Чăваш Республикин Журналистсен

союзĕн председателĕ

В. Комиссаров.