Стихи Анны Павловой

ПĔЛĔТСЕМ - ĔМĔТСЕМ...

Кăн-кăвак тÿпере пĕлĕтсем.

Кăпăшка, мамăк евĕр вĕсем.

Сан ачаш та çемçе аллуна

Пĕлĕтсем асилтерчĕç мана.

Шурă хурăн çинче

шăнкăрчсем

Шăратаççĕ çурхи юрăсем.

Шăнкăрав пек хитре

сассуна

Шăнкăрчсем асилтерчĕç мана.

Пĕлĕтсем пек чунри ĕмĕтсем,

Инçете талпăнаççĕ вĕсем,

Кайăк евĕр вĕçеççĕ. Мана

Ĕмĕтсем асилтерчĕç сана.

Пĕлĕтсем, ав,

шăваççĕ мала,

Кайăксем таврăнаççĕ яла.

Васкараххăн, савниçĕм,

килсем,

Сансăр тунсăх та питĕ кичем.

 

ÇИЛ-ТĂМАН

Пĕлĕт хăмăр, çилĕ хирĕç,

Куç уçма çук çил-тăман.

Вак пăрсем тăхлан пек тиврĕç

Пĕрчĕн-пĕрчĕн çамкаран.

Хăçанччен çапла халь пулĕ;

Курăнмасть Шăхаль кати.

Ăмсансан хĕвел те кулĕ,

Савăнĕ ватти-вĕтти.

Камăн чунĕ савса курнă,

Вăл сисмест хĕл сиввине.

Чĕринче ун çеçке çурнă,

Чунĕнче ун _ çуркунне!

 

САН СĂННА КУРАС ТЕСЕ

Сан сăнна курас тесе

Эп тухатăп улăха.

Тинкеретĕп тĕмсĕлсе

Çутă-çутă уйăха.

Сассуна илтес тесе

Шав çÿретĕп ĕшнере.

Тăрисене тимлесе

Уттаратăп уй-хире.

Уттуна курас тесе

Эп тухатăп çул çине.

Çил шуйханчĕ сĕртĕнсе

Йăрăс хурăн çулçине.

Куртăм уйăх пек сăнна,

Илтрĕм уçă сассуна,

Туйрăм çăмăл уттуна _

Лăплантартăн чунăма.

 

ÇĂЛКУÇ

Ту çинче çÿлте

Хыр кати ÿсет,

Шăрăх кунсенче

Хăй патне чĕнет.

Унăн çумĕнче

Пĕчĕк çăл тапать,

Сивĕ шывĕпе

Ăш-чике уçать.

Шăнкăртаттарса

Вăл ялан юхать,

Çĕр питне çурса

Çырмана анать.

Çу кунĕсенче

Çул çÿрен пырать,

Çăлкуç умĕнче

Вăл пуçне таять.

Хĕл сиввисенче

Çăл çаплах тапать,

Сивве çĕнтерсе

Пурпĕрех юхать.

Çук, типмест çырма,

Малаллах чупать.

Юлташне тупса

Тинĕсе васкать.

Çав çăлкуç пекех

Ĕмĕтĕм вĕçет,

Шухăш тек-текех

Тĕнчене виçет!